Santiago de Compostela, 31 de marzo de 2011.- O secretario Xeral do PSdeG, Pachi Vázquez, esixiu hoxe ao PP, e nomeadamente a Rajoy e a Feijóo, que pidan disculpas e desautoricen as palabras de Aznar nunha entrevista en Veo 7, nas que o ex presidente afirmou que Rajoy ”tiene capacidades, lo que pasa es que tiene su forma de ser, su origen gallego”.

Vázquez apuntou que os socialistas “coincidimos con Aznar na incompetencia e incapacidade de Rajoy, pero probablemente a súa maior virtude sexa a de ser galego”.

Sinalou que o feito de que “a dirección do PP e quen presidiu España  teñan ese concepto dos galegos é para botarse a temblar” e por elo considerou que Aznar “debe unha disculpa aos galegos e galegas”.

“Non queda espazo para medias frases e medias verdades”, salientou Vázquez, polo que reclamou a Rajoy e a Feijóo “que se teñen un mínimo de dignidade, non deben deixar pasar un minuto sen desautorizar a Aznar por estas palabras, e pedir escusas aos galegos e galegas”.

“O que máis me preocupa é que o ideólogo do PP, Aznar,  teña esa imaxe de Galicia, e que atribúa a incapacidade de Rajoy ao feito de ser galego”, explicou o líder socialista, para engadir que “nunca escoitei maior insulto, porque seguramente a única virtude que ten Rajoy é precisamente ser galego”, sentenciou.