Santiago de Compostela, 22 de marzo de 11. A portavoz de Xustiza e Servizos Sociais do Grupo Socialista, Beatriz Sestayo, acusou hoxe á Consellería de Traballo e Benestar de ter remitido unha directriz para derivar ao mercado privado as prestacións da Lei de Dependencia. Así o dixo no debate dunha moción socialista para que a Xunta faga públicos os datos da Dependencia en Galicia, que foi rexeitada polo PP.
Sestayo acusou á Xunta de “facer negocio coa necesidade allea”, para o que “boicotean os servizos públicos, estafan á cidadanía, machucan os dereitos dos usuarios da Lei da Dependencia, menten aos cidadáns e destrúen o servizo público”. A responsable socialista criticou que a Xunta obriga á prescrición de prestacións económicas para que os usuarios adquiran o servizo no mercado privado.
En concreto, explicou que a Xunta instou aos órganos de elaboración dos plans individualizados de atención –PIA- a que non prescriban en ningún caso o Servizo de Axuda a Domicilio como servizo do catálogo de prestacións da Lei. En cambio, o PIA debe “determinar” a prestación vinculada ao servizo, e polo tanto supón a súa adquisición no mercado privado.
Sestayo explicou que esta directriz obriga ao usuario a pagar o tripla que si accedera ao copago nun servizo público, seguindo o modelo implantado nas autonomías de Madrid, Valencia e Murcia. Dixo que isto condena a ter axuda a domicilio “quen poida pagala, e a quen non teñan recursos suficientes vostedes os deixan na cuneta” implantando unha “política de ricos e pobres: quen pode se salva e quen non se afunde”.
Acusou á Consellería de destinar as partidas que perciben do Estado para a Dependencia ás “libranzas vinculadas a empresas privadas que vostedes contratan e utilizar un servizo privado” en lugar de para servizos públicos e axuda a domicilio. Xriticou a “falla de vergoña” do PP que “axuda aos seus amigos mentres destrúen os dereitos dos cidadáns” nunha estratexia “de extrema dereita, que opta pola manipulación e a estafa”.
Información
A responsable socialista dixo que Galicia non cumpre cos indicadores da Lei da Dependencia, xunto coas autonomías de Madrid, Valencia e Murcia que “agochan os datos para beneficiar aos intereses privados”. Así o dixo logo de coñecer o rexeitamento do PP a unha moción para que a Xunta publique mensualmente os datos da evolución da dependencia en Galicia.
Os socialistas reclamaban que estes datos incluíran o número de solicitantes de dependencia, perfil e concello, os informes sociais dos concellos, as valoracións emitidas con grao e nivel, as resolucións de PIA cos dereitos e servizos recoñecidos, as prestacións concedidas e as prestacións efectivamente percibidas.
Tamén reclamou a posta en funcionamento das tecnoloxías necesarias para o acceso e intercambio de información entre os servizos técnicos implicados e o cumprimento das resolucións de PIA nos seus propios termos.
Sestayo criticou a “total e absoluta desinformación” por parte da Xunta na Atención á Dependencia para agochar que fronte ao compromiso electoral de Feijóo de pagar a 16.000 dependentes en espera, dous anos despois a realidade é que o número de dependentes desatendidos incrementouse en máis de 25.000 ata superar aos 41.150.
