Faga clic no icono para inicia-la descarga
EDITORIAL
Xacobeo 2010
Ano Santo Compostelán é unha festa que se ven celebrando dende hai séculos sempre que o día de Santiago cae en domingo. Este evento relixioso, de grande importancia para a Igrexa galega, pouco a pouco foi tomando un cariz de celebración profana ao marxe da influencia relixiosa, porén non debemos perder de vista que a base fundamental da celebración é un fenómeno relixioso e cunha localización xeográfica natural e perfectamente definida: a cidade de Santiago de Compostela.
Dende o ano 1640 o alcalde de Santiago é delegado rexio do Xefe do Estado na celebración da traslación do Apostolo. Isto supón que mais de 250 alcaldes da cidade exerceron a representación do Xefe do Estado nos actos relixiosos.
Negarlle a Compostela o recoñecemento de cidade de referencia do Ano Santo é descoñecer a historia. Pero querer cambiar a historia manexando caprichosamente os eventos do xacobeo desperdigando os recursos é unha forma de cinismo político.
No ano 1993 o Ano Santo gozou dunha transformación vivificante ao entrar a formar parte dos obxectivos políticos que, tanto o Concello como a Comunidade Autónoma, consideraron como base da promoción cultural e turística modernas. O Concello, co alcalde socialista Xerardo Estévez o fronte, estableceu os Anos Santos do 93 e do 99 como metas para a grande transformación urbanística da Capital de Galicia, obxectivos acadados nos prazos establecidos, convertendo a Compostela nun centro de atracción cultural, política e turística de grande importancia en toda Europa. Hoxe Santiago de Compostela é, sen dúbidas, a imaxe exterior de Galicia.
Aproveitando o éxito do Xacobeo nas convocatorias dos anos 1993, 1999, 2004, no que tomaron parte na súa organización, financiamento e execución o Goberno do Estado, a Xunta e o Concello, o goberno autónomo tratou de capitalizar en solitario o éxito e deslocalizar o Xacobeo 2010 transformándoo nunha cita para toda Galicia, que pouco a pouco foi perdendo alento. Pero sobre todo, a desafortunada idea da Xunta quedou de manifesto na presente edición na que a promoción é un verdadeiro desastre e a programación anda perdida polos concellos nos que goberna o PP.
Por fortuna, a potencialidade de Santiago de Compostela, e as políticas de promoción turística desenvolvidas polo Concello cos gobernos de Xosé A. Sánchez Bugallo, así como a implantación do evento relixioso en gran parte de Europa, salvarán a situación xa que o Xacobeo ten unha grande importancia como escaparate internacional para el desenvolvemento da promoción de Galicia, onde Santiago é a principal porta de entrada. O 85% do turismo que ven á nosa comunidade pasa por Compostela pero non todo conclúe na cidade que, con celebración de Xacobeo ou non, exerce de epicentro dunha forza centrípeta que beneficia a toda a comunidade autónoma.
