TERRITORIO E PERFIL
Concello de Cariño. Situado na provincia da Coruña en Galicia, está situado na comarca do Ortegal, entre a Serra da Capelada e a ría de Ortigueira. O 11 de abril de 1988, é a data na que Cariño se escindiu de Ortigueira, comezando a súa andaina como municipio. No entanto posúe unha dilatada historia.
Cariño viviu desde sempre envorcado ao mar, como o demostra a actividade do seu porto. A súa poboación é de 4.590 habitantes.
ENTIDADE PROMOTORA
Alcaldía
IDEA INNOVADORA EXEMPLAR
Que é Aula do Mar? A Aula do Mar é un proxecto que nace no concello de Cariño, e polo que se acadou transformar un antigo buque pesqueiro do cerco –localmente coñecido como tarrafa- nun referente local, autonómico e estatal no eido da xestión, posta en valor e interpretación de espazos naturais costeiros dende o corazón do propio ecosistema: o mar.
EXPERIENCIA
A idea de transformar un antigo buque pesqueiro nunha aula dinámica e interactiva de interpretación do medio mariño xurde do grupo de goberno local, aló polo ano 2004. Dende o concello de Cariño argallábase un xeito diferente de ensalzar e por en valor o maior patrimonio natural do concello: a súa riqueza mariña, paisaxística, xeolóxica e faunística.
Logo dun acordo cunha antiga familia de armadores navais veciños da vila, quenes de maneira exemplar colaboraron na cesión da embarcación ó patrimonio municipal, o equipo de goberno do consistorio cariñés propúxose transformar a nao nun ámbito único, un punto de referencia para o uso, a aprendizaxe e o desfrute da poboación civil. Deste xeito a cidadanía podería achegarse ó mundo mariño dende unha perspectiva senlleira, poucas veces accesible: navegando nun auténtico barco mariñeiro.
Os traballos de rehabilitación e adaptación do buque para o seu funcionamento comezaron no primeiro semestre do ano 2006, e procuraron dous obxetivos claros. Dunha banda tratouse de ser fiel á tipoloxía tradicional da embarcación, remodelando e eliminando o menor número de elementos e útiles empregados para as tarefas de pesca. Con esta medida buscábase que os potenciais usuarios chegasen a comprender –co maior grao de exactitude e fidelidade posible- como se artellaban as faenas pesqueiras no seo dunha embarcación cerqueira.
Por outro lado, e seguindo as recomendacións dos técnicos especialistas en seguridade marítima do Ministerio de Fomento, adoptáronse cantas medidas de prevención, salvagarda e navegabilidade foron requeridas co gallo de garantir un correcto desenrolo das actividades que se pretendían levar a cabo, minimizando o risco de accidentes.
As tarefas de reconversión englobaron, entre outras, a instalación completa de asentos para os tripulantes, a incorporación de numeroso material salvavidas, suministro de equipos contraincendios, melloras na accesibilidade, automatización de sistemas de alarmas ou a eliminación de barreiras físicas.
Para acometer todos estes traballos consignáronse partidas orzamentarias nos presupostos municipais, se ben os fondos aportados polas diferentes administracións supramunicipais –entre as que compre sinalar á Consellería de Medio Ambiente da Xunta de Galicia- limitaron a repercusión que os gastos derivados da posta en funcionamento do servizo poidesen ter nas arcas locais, contribuindo así a manter un correcto equilibrio orzamentario.
Logo de largos trámites burocráticos, a posta en marcha do Aula do Mar como barco de entretemento e educación medioambiental tivo lugar no outono do ano 2007.
A DESTACAR
Todas as accións desenroladas polo Aula do Mar teñen como marco exclusivo de estudio, actuación e divulgación da costa e mares do concello de Cariño.
Equilibrio ecolóxico e actividade sostible
Unha das teimas que se perseguía con maior empeño dende o consistorio era a de que as actividades repercutisen negativamente o menos posible no medio natural. A propia idiosincrasia do servizo limita enormemente a degradación do contorno, xa que está adicado ó avistamento e desfrute do litoral dende o mar, co que se eliminan problemas de molestias e impacto directo sobre a fauna, flora e xeoloxía do ecosistema.
Impacto na economía local
Ó longo das tempadas 2008 e 2009 puidose constatar o importante impacto económico que o proxecto tivo sobre o comercio e a hostalería local, cun evidente aumento no número de pernoctas e xantares. A maior afluenza de visitantes á vila, atraídos pola singular oferta náutica do Aula do Mar, repercutíu no comercio local, ademáis de convertirse nunha fenomenal ferramenta de difusión e promoción do concello de Cariño cara o exterior.
O feito de que o calendario de excursións ornitolóxicas se realice nos meses de outono afonda á súa vez nunha maior desestacionalización do turismo local.
REFERENCIA TEMPORAL
Indefinido no tempo
DOCUMENTACIÓN A CONSULTAR
http://www.concellocarino.org/
CONTACTO
José Luis Armada Castro. Alcalde (jluisarmada@yahoo.es)
