Santiago de Compostela, 1 de decembro de 2009.- A Secretaria de Igualdade, Emigración e Movementos Sociais do PSdeG, Laura Seara,  avogou hoxe, no Día Mundial da Sida, por unha visión “mais integradora” nas políticas en materia de prevención, apoio e tratamento da SIDA.

Así se recolle no manifesto do PSOE, que incide na necesidade “crucial” de protexer os dereitos humanos e de acadar “o dereito e acceso universal” á prevención, tratamento, atención e apoio en relación co VIH.
 

 “Para as mulleres e homes socialistas, acadar estos obxectivos é un imperativo”, sinalou Seara, xa que o PSdeG-PSOE considera “fundamental” que a resposta mundial a esta pandemia  “se fundamente nos dereitos humanos e que a discriminación e as leis que castigan ás poboacions máis afectadas polo  VIH sexan eliminadas”.
 

Seara lembrou que 84 países dispoñen de leis e políticas que son un obstáculo para a prevención, tratamento, atención e apoio eficaces do VIH para as poboacións vulnerables e que 59 países teñen aínda leis que limitan a entrada, estancia e residencia das persoas que viven con VIH baseándose únicamente no seu estado seropositivo, o que as discrimina na súa libertade de movemento e dereito ao traballo.
 

Visión global

Por elo, Seara instou á Xunta de Galicia a integrar nas súas actuacións unha “visión global” e a comprometerse a velar para que na nosa comunidade se tomen as medidas adecuadas “para a eliminación do estigma e a discriminación que sufren moitos enfermos do VIH”.
 

A secretaria de Igualdade e Movementos Sociais do PSdeG manifestou  o compromiso socialista de “reforzar e potenciar o traballo de organismos e institucións responsables das políticas relacionadas co VIH”,  ao tempo que afirmou que “dar unha desposta eficaz á infección por VIH e aos problemas asociados á mesma é unha prioridade na axenda dos socialistas”.