Santiago de Compostela, 16 de xullo de 2009. A viceportavoz do Grupo Parlamentario dos Socialistas de Galicia, Mar Barcón, dixo hoxe que “o que Feijóo bautiza como rexeitamento intelixente” en alusión á súa votación no Consello de Política Fiscal e Financeira é en realidade “o cinismo que coñecemos de sempre”. A parlamentaria socialista acusa así ao presidente da Xunta de “pretender dicir unha cousa e a contraria ao mesmo tempo”.

Mar Barcón asegura que o presidente da Xunta “minte e manipula cos datos da negociación” porque “mantívose á marxe das conversas e pretende apuntarse un tanto a última hora inventando cifras que nunca existiron”. A parlamentaria socialista reclama ao xefe do Executivo autonómico que explique “onde estaba e qué facía en lugar de negociar un acordo de financiamento positivo para Galicia”.