Santiago, 17 de xuño de 09. A portavoz de Xustiza, Interior e Administración Local do Grupo Parlamentario dos Socialistas de Galicia, Beatriz Sestayo, acusou hoxe ao conselleiro de Presidencia de paralizar o desenvolvemento da Lei de Emerxencias de Galicia “poñendo a nosa Comunidade nunha situación de menor seguridade e maior risco”. Sinalou que o conselleiro “minte” sobre a Axencia Galega de Emerxencias para xustificar a privatización dos servizos de xestión de emerxencias de Galicia.


A parlamentaria socialista sinala que a Xunta quere “desmantelar” os sistemas públicos de emerxencias “para volver ao sistema caciquil, improvisado e manipulador” de anteriores etapas do PP. Reclamou neste sentido o mantemento do compromiso de creación dos consorcios provinciais de emerxencias en maio de 2010, así como que se respecten os acordos cos bombeiros de Galicia para establecer un sistema de xestión pública destes servizos.


A portavoz socialista instou ao conselleiro a que explique o seu modelo de xestión de emerxencias e advertiu que a “marcha atrás” que pretenden suporá a reedición do colapso dos sistemas de atención de emerxencias. Demandou do conselleiro “que diga abertamente que quere privatizar este servizo e que explique si vai respectar o acordo co anterior goberno da Xunta e os servizos de emerxencias”.


Sestayo demandou tamén unha “rectificación pública” das declaracións de Rueda contra a Axencia Galega de Emerxencias feitas, dixo, por “ignorancia ou mala fe” e, en calquera caso, “valéndose de mentiras para facer política”. Sestayo reclamou ao novo responsable de Presidencia que conclúa a construción da plataforma tecnolóxica programada polo anterior goberno e que permitirá xestionar as emerxencias de forma coordinada.


Reclamou a Rueda que “non minta con declaracions que suxiren a compra de servizos informáticos”. Neste sentido dembrou que o anterior Goberno contratou unha aplicación e o desenvolvemento dunha aplicación informática que levará alomenos dous anos, ademais, explicou actualmente hai un edificio programado e orzamentado con cargo á Sociedade Pública de Investimentos destinado a permitir unha xestión integral e eficaz dos sistemas de emerxencia.